Ósáttur við herferð

John Lydon, betur þekktur sem Johnny Rotten, er ekki hrifinn af herferð sem aðdáendur The Sex Pistols eru með í gangi á Facebook. Á næstunni verða 35 ár liðin síðan smáskífulag pönksveitarinnar, God Save the Queen, kom út og verður það endurútgefið af því tilefni. Aðdáendurnir vilja koma laginu í efsta sæti breska vinsældalistans vegna þess að á sínum tíma var það svikið um toppsætið að þeirra mati. Lydon þykir lítið til uppátækisins koma.

„Ég er stoltur af því sem The Sex Pistols áorkuðu en þessi herferð grefur undan því sem hljómsveitin stóð fyrir. Ég er ánægður með að nýjar kynslóðir hlusti á lögin með The Sex Pistols en ég vil ekki taka þátt í sirkusnum sem er kominn af stað,“ sagði söngvarinn.