Yrsa spennt að sjá hverjir leika í myndinni

Yrsa Sigurðardóttir er spennt að sjá hverjir munu leika í kvikmyndinni Ég man þig.

„Ég fæ ekki að ákveða neitt," segir Yrsa sem skrifaði spennusöguna Ég man þig. Sigurjón Sighvatsson keypti kvikmyndaréttinn á sögunni á dögunum. Óskar Þór Axelsson sem gerði myndina Svartur á leik hefur verið ráðinn sem leikstjóri. Hann mun vitanlega ákveða leikaraliðið og Yrsa hlakkar til að sjá hverjir verða fyrir valinu.

Hún ætlar að reyna að skipta sér sem minnst af framleiðsluferli myndarinnar. Hún fær að fylgjast með að vild. „En ég held nú samt ég yrði bara til trafala í sjálfri úrvinnslunni," segir hún.

Óskar og starfsfólks hans sjá alfarið um handritsgerðina. Yrsa kemur ekki nálægt henni og hefur engan hug á því. Þegar hefur verið lokið við síðustu drög að handritinu. Næsta vetur munu Óskar og starfsfólk hans fínpússa handritið og ljúka við fjármögnun. Ef allt gengur að óskum telur Yrsa að tökur gætu hafist eftir rúmt ár.

Bókin Ég man þig hefur vakið talsverða athygli erlendis. Hún kom út í Noregi á þessu ári. Síðastliðinn mánudag tók Yrsa á móti blaðamanni frá norska dagblaðinu Aftenposten og ræddi við hann um söguna og sögusvið hennar, Hesteyri á Vestfjörðum.

„Hún var að skrifa um bókina, en það gerir blaðagreinina svo miklu áhugaverðari að geta séð staðinn sjálfan," segir Yrsa en náttúran á Hesteyri ku vera afar tilkomumikil. Greinin verður eflaust birt á næstu dögum.

Þessa dagana er Yrsa á kafi í ritstörfum. Hún er að ljúka við nýja bók. Bókin kemur út um næstu jól. Enn veit hún ekki hvað bókin verður nefnd. „Titill er alltaf það allra allra síðasta sem kemur hjá mér. Ég þvinga hann ekki fram fyrr en daginn fyrir prentun. Hann dúkkar ekkert fyrirhafnarlaust upp."

Þegar Yrsa byrjar á bók hefur hún fyrst óljósa hugmynd um hvað henni þykir spennandi. Svo hugsar hún út í eitt um hvernig það gæti orðið enn meira spennandi. Hún reynir að tengja saman fáeina hluti sem henni þætti áhugavert að lesa um sjálfri og sjóða þannig saman söguþráð.

„Svo vona ég bara að hann sé ekki of fyrirsjáanlegur."