Anton Sveinn: Ótrúlegt að heyra fagnaðarlætin

Anton Sveinn McKee var fyrsti Íslendingurinn sem keppti á Ólympíuleikunum í Lundúnum en það gerði hann í 400 m fjórsundi í morgun. Hann var þó nokkuð frá sínu besta í greininni en var glaðbeittur í viðtali við blaðamann eftir að hann kom upp úr lauginni.

„Ég er fyrst og fremst bara mjög glaður yfir því að hafa keppt á Ólympíuleikum," sagði Anton Sveinn við Vísi eftir keppnina í dag. „Það er efst í mínum huga þessa stundina. Ég er ekkert mjög glaður yfir því að hafa ekki bætt mig en það verður verkefni til að vinna í í framtíðinni."

Íslandsmet Antons er 4:23,64 mínútur en hann var tæpri einni og hálfri sekúndu frá því. „Ég var búinn að stefna að því að fara undir fjórar og tuttugu og veit ég ekki hvað klikkaði. Mér fannst þetta vera fínt sund hjá mér og nú verð ég bara að halda áfram að vinna í mínu málum."

Hann segir að baksundið sé að skapa sér mestu vandræðin. „Ég er ekki nógu góður í baksundinu og það er að halda mér aftur í greininni. Ég þarf að taka það í gegn á næsta tímabili. En ég er nokkuð nýr í þessari grein og ég er mjög sáttur við niðurstöðuna - sérstaklega þar sem ég veit að ég á mikið inni."

Bradley Ally frá Barbados bar sigur úr býtum í riðlinum og var um fjórum sekúndum á undan Antoni, sem átti þó betri skráðan tíma. „Á Ólympíuleikum ætla allir að standa sig vel og því skiptir það í raun ekki máli á hvaða tíma menn eru skráðir inn. Ég hefði svo sem viljað halda betur í hann og veitt honum meiri samkeppni en ég gaf allt mitt í þetta - ég gat ekki gert meira."

Hann neitar því ekki að það hafi verið afar sérstök stund fyrir sig að vera kynntur til leiks. „Það var ótrúlegt að heyra fagnaðarlætin þegar maður labbaði inn. Ég er ekki vanur þessu. Þetta var líka fyrsti riðillinn í fyrstu greininni sem var mjög skemmtilegt."

„En nú er þetta bara búið og ég ætla ekki að svekkja mig á þessu. Ég er fyrst og fremst bara mjög glaður með að vera hér og nú á ég aðalgreinina - 1500 m skriðsund - eftir. Nú er hrollurinn kominn úr manni og ekkert sem getur komið lengur á óvart."