23 ára kínversk kona vann fyrstu gullverðlaunin á ÓL í London

Yi Siling, 23 ára kona frá Kína, vann fyrstu gullverðlaunin á Ólympíuleikunum í London þegar hún tryggði sér sigur í keppni í tíu metra loftriffli. Sigur hennar kom ekki á óvart því hún er efst á heimslistanum, heimsmeistari og heimsmethafi.

Yi Siling vann heimsmeistaratitilinn fyrir tveimur árum og fékk nú alls 502,9 stig og var 0,7 stigum á undan pólsku stúlkunni Sylwia Bogacka. Önnur kínversk stúlka, Yu Dan, fékk síðan bronsverðlaunin en Ólympíumeistarinn frá því fyrir fjórum árum, Katerina Emmons frá Tékklandi, endaði í fjórða sæti.

Yi Siling var ekki nálægt heimsmeti sínu en var afar ánægð með gullið sitt. „Þetta er mjög spennandi og ég er mjög ánægð. Ég þakklát Kína og mömmu og pabba sem ég elska afar mikið," sagði Yi Siling sem þurfti að vakna klukkan fimm í morgun til að undirbúa sig fyrir keppnina.

„Ólympíugullið mun breyta mínu lífi og mér líður eins og ég sé orðin fullorðin. Ég er breytt manneskja," sagði Yi Siling.