Þjónusta mun aukast með sameiningu

Formaður bæjarráðs Álftaness segir það skipta Álftnesinga miklu máli að þjónusta við bæjarbúa muni aukast með sameiningu við Garðabæ. Hann segir viðhorf til sameiningar sé mjög jákvætt meðal bæjarbúa nú ólíkt því þegar fyrri kosningar um sameiningu áttu sér stað.

Í fréttum okkar í gær sagði bæjarstjóri Garðabæjar, Gunnar Einarrson, að sameinað sveitafélag Álftaness og Garðabæjar sé hagkvæmur kostur en íbúar munu kjósa um sameiningu sveitafélaganna 20 október næstkomandi. Kjartan Örn Sigurðsson formaður bæjarráðs Álftaness tekur undir þetta.

„Það sem skiptir Álftnesinga mestu mali er að þjónustan haldist áfram eins og hún hefur verið hingað til og ég er búinn að sitja í sameiningarnefndinni í rúm tvö ár og það er alveg ljóst að þó að bæjarskrifstofurnar færist inn í Garðabæ þá mun þjónusta við Álftnesinga aukast. Það mun vera mun meiri stuðningur við fræðslustarfið hér bæði við grunnskólann okkar sem er einn sá stærsti á höfuðborgarsvæðinu, leikskólann, tónlistarskólann og svo mætti lengi telja," segir Kjartan.

Hann segir samfélögin í Garðabæ og á Álftanesi vera lík samfélög að öllu leyti nema aldurssamsetningu þar sem Álftanes er með yngstu samfélaga á landinu og Garðabær með því elsta, þannig muni sameining jafna tekjur og aldurskiptingu sveitafélaganna. Hins vegar hafa Álftnesingar tvsivar fellt sameiningartillögur, bæði í kosningu og könnun meðal íbúa.

„Það ríkir hins vegar allt annað viðhorf á Álftanesi í dag og það horfir við okkur að það hefur verið þrýstingur á að sveitafélög sameinist og þetta myndi gefa þessum tveimur sveitafélögum sameinuðum mun meiri slagkraft, bæði gagnvart ríkinu og styrk gagnvart öðrum sameiningum á seinni tímum," segir Kjartan.