Obama endurkjörinn

Barack Obama, forseti Bandaríkjanna, hefur verið endurkjörinn í embætti. Mótframbjóðandinn, Mitt Romney, óskaði honum til hamingju með sigurinn rétt fyrir klukkan sex í morgun.

Það liggur þó enn ekki fyrir hversu miklir yfirburðir Obama eru þar sem þrjú ríki eiga enn eftir að tilkynna lokaniðurstöður talninga. En allt útlit er þó fyrir að Obama hafi fengið 290 kjörmenn og Romney 206.

Kosningakerfið í Bandaríkjunum virkar þannig að hvert ríki fær ákveðinn fjölda kjörmanna í hlutfalli við fjölda íbúa í ríkinu. Sá forsetaframbjóðandi sem fær 270 kjörmenn vinnur kosningarnar. Atkvæði á landsvísu þykja táknræn og líka pólitísk mikilvæg en hafa þó lítið að segja um úrslit kosninganna. Enn liggur ekki fyrir hvor fékk fleiri atkvæði á landsvísu, Obama eða Romney.

Obama náði kjöri með því að vinna meirihluta kjörmanna í ríkjum sem hingað til hafa stutt dyggilega við bakið á demókrötum og hann fékk líka meirihluta í fjölmörgum lykilríkjum, eins og Colorado, Iowa, Pennsylvaníu, Michigan, Minnesota og Wisconsin. Naumur sigur hans í Ohio, tryggði honum svo endanlega sigurinn.

Í gær voru einnig kosnir ríkisstjórar í ellefu ríkjum, auk þess sem kosið var um 100 fulltrúa í öldungadeild þingsins og öll 435 sætin í fulltrúadeildinni. Búist er við því að Repúblikanar haldi meirihluta í fulltrúadeildinni en Demókratar verði enn með meirihluta í öldungadeildinni.

Það þykir nokkrum tíðindum sæta að Obama hafi náð endurkjöri sem forseti enda er atvinnuleysi í Bandaríkjunum nokkuð hátt, eða um 7,9% og efnahagslífið frekar slæmt.

Á Twittersíðu sinni sagði Obama:

"Þetta er ykkur að þakka. Takk fyrir."

"Við erum öll í þessu saman. Við lögðum upp með það, og það er það sem við erum. Takk fyrir. -bo"

"Fjögur ár í viðbót!"