Íslenska lögreglan næstum best í heimi á facebook

Lögreglan á höfuðborgarsvæðinu hefur vakið verðskuldaða athygli fyrir notkun sína á samfélagsmiðlum á borð við Facebook og Twitter. Lögregluembættið var fyrr á árinu tilnefnt til virtra alþjóðlegra verðlauna fyrir þessi rafrænu umsvif sín, ásamt tveimur öðrum embættum. Nú nýlega var tilkynnt um hver fór með sigur af hólmi en það var ekki íslenska embættið.

Það var New South Wales lögreglan í Ástralíu sem hlaut hin virtu ConnectedCops verðlaun. Stefán Eiríksson, lögreglustjóri á höfuðborgarsvæðinu, segir að ekki hafi komið fram hvort íslenska lögreglan lenti í öðru eða þriðja sæti. „Þetta var annað hvort silfur eða brons. Við höfum heyrt frá skipuleggjendunum að mjótt hafi verið á munum," segir hann.

Lögreglan á höfuðborgarsvæðinu færir sífellt út kvíarnar á hinum rafræna vígvelli samskiptamiðlanna. Þeir hafa lengi verið virkir á Facebook og Twitter. Nú nýlega opnuðu þeir Instagram síðu og Youtube aðgang. Þeir eru því með fingurna í flestum samfélagsmiðlum sem maður kannast við og því vekur furðu að einhver geti skákað þeim.

„Þetta er auðvitað líka spurning um hvernig maður nýtir miðlana," segir Stefán og útskýrir að kollegar lögreglunnar í Ástralíu séu komnir með notkun samfélagsmiðla á örlítið hærra og þróaðara plan en lögreglan á höfuðborgarsvæðinu. „Þeir eru að gera mjög spennandi hluti og við ætlum bara að læra af þeim. Koma sterkir inn á næsta ári.," segir Stefán.