Lýsi hjálpar hjarta- og æðasjúklingum lítið

Það að taka lýsi hjálpar þeim sem eru með hjarta- og æðasjúkdóma lítið. Þetta sýnda niðurstöður nýrrar rannsóknar sem eru nokkuð ólíkar þeim sem áður hafa komið fram.

Rannsóknin birtist í tímariti bandaríska Læknafélagsins í gær en þar eru rannsökuð áhrifin af Omega þrír fitusýrum. Rannsóknin er í raun samantekt á tuttugum rannsóknum sem gerðar hafa verið á áhrifunum af því að taka fitusýrurnar. Í þeim öllum voru flestir þátttakendur með undirliggjandi hjarta- og æðasjúkdóma. Til að skoða áhrifin tók hluti þeirra sem tók þátt lýsi og hluti lyfleysu.

„Hún er í rauninni að segja okkur það að ef við erum með hóp af fólki sem er með undirliggjandi hjarta- og æðasjúkdóma þá borgar sig kannski ekki endilega að ráðleggja þeim að taka lýsi ef þeir eru vel meðhöndlaðir af öðru leyti. Því að þessi rannsókn sýnir fram á kannski, þetta er samantekt á mörgum stórum klínískum rannsóknum og áhrifin eru í besta falli samkvæmt þessari rannsókn gagnslaus, það er þau eru á bilinu gagnslaus til mjög veik," segir Þórhallur Ingi Halldórsson, lektor við matvæla- og næringarfræðideild Háskóla Íslands.

Þannig gagnist það að taka lýsi lítið í að koma í veg fyrir hjartaáföll. Þórhallur segir þetta í raun á skjön við það sem áður var talið.

„Fyrstu niðurstöður bentu til þess að þetta væri mjög jákvætt en svo virðist það hafa breyst en það getur verið að meðhöndlun á fólki með þennan sjúkdóm sé orðin betri. En þessi rannsókn segir ekkert til um það hvort að fólk sem að ekki er búið að þróa með sér sjúkdóminn eigi að taka lýsi eða ekki því að það er allt annar hlutur. Því það eru aðrar tilraunaniðurstöður sem að benda mjög sterklegar til þess að fiskur eða sjávarfang eða Omega 3 fitusýrur séu gagnlegar eða fyrirbyggjandi gagnvart hjarta- og æðasjúkdómum en þegar fólk er komið með sjúkdóminn þá getur kannski verið annað uppi á teningnum."