Jón Gnarr afhjúpaði Óþekkta embættismanninn á nýjum stað

Æðsti embættismaður Reykjavíkurborgar, Jón Gnarr, bauð kollega sinn, Óþekkta embættismanninn, velkominn á nýjan verustað við Tjarnarbakkann í dag. Óþekkti embættismaðurinn var í vikunni fluttur af torginu aftan við Jómfrúna við Lækjargötu og að Tjarnarbakkanum og Jón Gnarr afhjúpaði listaverkið á nýjum stað í dag.

Útilistaverkið Óþekkti embættismaðurinn er eftir Magnús Tómasson, myndlistarmann sem segist ánægður með nýju staðsetninguna. „Nú er hann kominn af stallinum og niður á jörðina," segir Magnús.

Verkið þótti ekki njóta sín sem skyldi á fyrri verustað sínum og var flutningurinn hugsaður til að koma honum á fjölfarnari stað. Ekki spillti fyrir að nú stendur Óþekkti embættismaðurinn nær Ráðhúsinu og Alþingishúsinu og er því í betri tengslum við stjórnsýsluna eins og hún leggur sig.