Gunnlaugur og frú íhuga að áfrýja til Hæstaréttar

Hjónin Gunnlaugur M. Sigmundsson og Sigríður G. Sigurbjörnsdóttir telja að dómur Héraðsdóms Reykjavíkur í máli þeirra gegn Teiti Atlasyni sé rangur í veigamiklum atriðum. Eins og kunnugt er var Teitur sýknaður af bótakröfum vegna ummæla sem Teitur viðhafði á bloggi sínu. Kröfum um ógildingu ummæla var vísað frá.

Þau Gunnlaugur og Sigríður telja fullt tilefni til þess að íhuga áfrýjun, segir í yfirlýsingu sem lögmaður þeirra sendi fyrir þeirra hönd. Þar segir að dómurinn komi sér undan því að taka á þeirri grunnspurningu málsins hvort tilefnislaust netníð eins og það sem stefnendur hafi mátt þola af hálfu stefnda fái staðist lög.

„Frávísun aðalsakar stríðir gegn fyrri dómafordæmum Hæstaréttar í sambærilegum málum. Að auki fæst ekki staðist að sýkna í framhaldssök vegna atvika sem sannanlega áttu sér stað eftir að stefndi hafði sett umstefnd meiðandi ummæli á netið," segir í yfirlýsingunni.