Innlent

Lyf ekki alltaf besti kostur gegn of háum blóðþrýstingi

Lyfjameðferð gegn mildum háþrýstingi hefur takmarkaðan árangur í för með sér og bættir lifnaðarhættir eru vænlegri til árangurs. Þetta kemur fram í nýrri grein í British Medical Journal. Prófessor í læknisfræði við Háskóla Íslands (HÍ) segir að ef farið verði eftir tilmælum sem sett eru fram í greininni gæti það haft áhrif á meðferð tugþúsunda Íslendinga og skilað sparnaði í heilbrigðiskerfinu.

Mildur háþrýstingur er þegar efri mörk blóðþrýstings eru frá 140 til 159 og/eða neðri mörk frá 90 til 99. Greinin fjallar um samantekt Cochrane-stofnunarinnar á fjórum rannsóknum sem taka til tæplega 9.000 einstaklinga frá Bandaríkjunum, Bretlandi og Ástralíu, með mildan háþrýsting án hjarta- og æðasjúkdóma. Rannsóknin leiðir í ljós að lyfjameðferð hjá þessum hópi hefur ekki í för með sér lægri heildardánartíðni, lægri dánartíðni af völdum hjarta- og æðasjúkdóma eða heilablóðfalla.

Lyfjagjöf geti hins vegar haft í för með sér aukaverkanir sem vegi upp á móti þeim árangri sem gæti náðst. Er vonast til þess að niðurstaðan verði til þess að læknar breyti meðhöndlun þeirra sem eru með mildan háþrýsting og frekar verði mælt með betra mataræði og meiri hreyfingu en lyfjum.

Jóhann Ágúst Sigurðsson, prófessor við læknadeild HÍ, segir óhætt að áætla að tugir þúsunda Íslendinga séu í þessum hópi. Niðurstöðurnar sýni að hægt sé að bæta meðferð sjúklinga og spara í heilbrigðiskerfinu með því að draga úr lyfjagjöf og fækka blóðrannsóknum og læknisheimsóknum.

„Þessi rannsókn segir okkur að við skilgreinum of marga einstaklinga sem sjúklinga að óþörfu. Við þurfum að skera úr um hvort hægt sé að draga úr kostnaði, annaðhvort með því að draga úr lyfjanotkun, eða jafnvel hætta henni alfarið í sumum tilfellum."

Jóhann segir að þó ekki sé nauðsynlegt að taka þessar niðurstöður of bókstaflega, þar sem rannsóknin hefur takmarkaða eftirfylgni, sé hins vegar mjög mikilvægt að þær fari í umræðu hér á landi.

- þj



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×