Talið er að 200 þúsund hafi flúið Aleppó

Talið er að um 200 þúsund manns hafi flúið borgina Aleppó um helgina og undirbúa þjóðir sig undir aukin straum flóttamanna. Forstjóri Útlendingastofnunnar segir að hér á landi verði fylgt fordæmi annarra Evrópuþjóða um að fólk verði talið flóttamenn við það eitt að koma frá Sýrlandi og fái að auki viðbótarvernd.

Sameinuðu þjóðirnar vara við mikilli neyð almennings í Aleppo. Valerie Amos, mannúðarfulltrúi Sameinuðu þjóðanna, greindi frá því í gær að ekki væri vitað hve margir væru enn í borginni en talið væri að 200 þúsund manns hefðu flúið hana um helgina.

Kristín Völundardóttir, forstjóri Útlendingastofnunar, segir að Evrópuþjóðir séu undirbúnar fyrir straum flóttamanna frá Sýlandi og Íslendingar muni fylgja fordæmi þeirra.

„Allar Evrópuþjóðirnar eru í viðbragðsstöðu, við eigum í samskiptum í gegnum tölvupósta, ríki gera ráð fyrir því að fá einhvern fjölda til sín, mismundandi eftir því hvar þau liggja en við sjáum að allir búnir eða eru að undirbúa sig fyrir komu fleiri en eru í venjulegu ári," segir hún.

Kristínu þykir þó fremur ólíklegt að Íslendingar muni verða varir við mikinn fjölda vegna legu landsins. Útlendingastofnun hafi því ekki sérstakan undirbúning annan en þann að fylgja eftir þeirri línu sem mörkuð hefur verið annar staðar í Evrópu næstu þrjú ár.

„Línan verður sú og ég veit að Svíþjóð og Holland hafa ákveðið það að það verður svokölluð viðbótarvernd, það er að þú ert talin vera flóttamaður við það eitt að koma frá Sýrlandi að því gefnu að það tengi þig ekkert við þau stjórnvöld sem fólkið er að flýja."

Einn maður hefur þegar leitað hælis hér landi. Kristín segir að hann mál hafi orðið til þess að Útlendingastofnun ákvað að kanna gaumgæfilega hvernig aðrar þjóðir meðhöndluðu umsóknir frá Sýrlandi og eftir það hafi verið ákveðið að sami háttur yrði hafður á hér á landi.

„Ég tók þá ákvörðun að við myndum fylgja þeirri línu þannig að sú umsókn var sett framfyrir aðrar. Í því tilviki er jafnframt um að ræða fjölskyldu sem getur verið í hættu. Þannig ef fleiri umsóknir koma frá Sýrlandi þá mun það sæta sömu meðferð, það er að þetta fer í forgang í málsmeðferðinni. En þá má einnig geta þess að við höfum dvalarleyfisumsókn þar sem viðkomandi er staddur í Sýrlandi og við munum líka setja hana í forgang vegna þessa."