Ragna ekki fyrsti Íslendingurinn til að vinna badmintonleik á ÓL

Í kjölfar glæsilegs sigurs Rögnu Ingólfsdóttur á andstæðing sínum frá Litháen á Ólympíuleikunum í London í gær greindu fjölmiðlar frá því að þar með hefði hún landað fyrsta badmintonsigri Íslendings á Ólympíuleikum frá upphafi. Það er hinsvegar ekki rétt þar sem Árni Þór Hallgrímsson fagnaði einnig sigri á leikunum í Barcelona, 1992.

Árni hafði þá betur gegn mótherja sínum frá Suður-Afríku, Anton Kriel. Árni vann í tveimur lotum, 15-8 og 15-7. Hann tapaði hinsvegar í næstu umferð gegn Suður-Kóreumanni og féll þar með úr leik.

Árni keppti einnig í tvíliðaleik í Barcelona með Brodda Kristjánssyni en þeir félagar töpuðu fyrsta og eina leik sínum á leikunum.

Rétt er þó að Ragna er fyrsta íslenska konan sem fagnar sigri í badminton á leikunum.