Sandra María með tvö í öruggum sigri Þór/KA á Fylki

Þór/KA heldur efsta sæti Pepsi-deildar kvenna að loknum níu leikjum en liðið lagði Fylki að velli 4-0 norðan heiða í dag.

Sandra María Jessen kom heimakonum yfir á 18. mínútu og var aftur á ferðinni tuttugu mínútum síðar. Þá tók Sandra María boltann á lofti eftir fyrirgjöf frá hægri og Íris Dögg Gunnarsdóttir réð ekki við skotið. Tíunda mark Söndru í deildinni en hún er markahæst.

Katrín Ásbjörnsdóttir kláraði svo færi vel á lokamínútu fyrri hálfleiks og sigurinn svo gott sem í höfn.

Heimakonur bættu við marki á 69. mínútu þegar Bandaríkjakonan Tahnai Annis skoraði og stórsigur Akureyrarliðsins staðreynd.

Þór/KA heldur toppsæti deildarinnar með sigrinum. Liðið hefur 22 stig en útlit er fyrir að Breiðablik og Stjarnan haldi áfram að anda ofan í hálsmál Norðankvenna. Liðin eru með örugga forystu í leikjum sínum sem nú standa yfir.

Fylkir situr sem fastast í 6. sæti deildarinnar með 11 stig.