Tekur sig ekki of hátíðlega

„Ég er aðallega að gera litla „vídeósketsa“ á DV á lífsstílssíðunni Fókus. Markmiðið er að gera sketsa og vídeóblogg um allt og ekkert. Þetta er í þróun. Aðalmálið er að hafa gaman af þessu og taka sig ekki of hátíðlega,“ segir leikkonan Brynja Valdís Gísladóttir, sem hefur vakið athygli á veraldarvefnum fyrir að vera á persónulegu nótunum um samskipti kynjanna meðal annars.

Finnst þér ekkert mál að opna þig svona á veraldarvefnum í myndskeiðunum?

„Þetta er bara fjör og góð áskorun. Sem skemmtikraftur þá þarf maður að þora að láta vaða og í vídeósketsunum notfæri ég mér það og spinn og blanda saman reynslu minni og annarra sem ég sný svo út úr og færi í stílinn. Auk þess geri ég það sem mér dettur í hug út í bláinn. Eins og þegar ég talaði um hvernig á að ná í góðan mann. Þá er ég með ýmsar ráðleggingar um hitt og þetta. Maður þarf bara að vera einlægur. Svo krydda ég það með húmor,“ segir þessi skemmtilega leikkona.

Heimasíða Brynjavaldis.com.