Hreint hjarta sigraði á Skjaldborg

Heimildamyndin Hreint hjarta eftir Grím Hákonarson um séra Kristinn Ágúst Friðfinnsson á Suðurlandi var valin besta myndin á heimildamyndahátíðinni Skjaldborg á Patreksfirði um helgina. Á þriðja hundrað manna mætti vestur.

Sautján íslenskar heimildamyndir voru frumsýndar á hátíðinni sem var haldin núna um hvítasunnuhelgina í sjötta sinn. Það eru áhorfendur sem velja bestu myndina - og hún var að þessu sinni um litríkan prest á Selfossi og nágrenni. Þetta er annað árið í röð sem heimildamynd um prest fellur áhorfendum best í geð.

Myndin fjallar um Kristinn Ágúst Friðfinnsson sem hefur verið prestur á Selfossi og nágrenni í 20 ár. Hann er litríkur karakter sem er ekkert óviðkomandi þegar kemur að prestsþjónustunni. Í myndinni fá áhorfendur að kynnast manninum á bakvið hempuna og þeim fjölmörgu störfum sem prestar vinna sem ekki eru sýnileg.

Kristinn er mjög eftirsóttur sálgætir og hefur varla undan því að leysa úr vandamálum fólks daginn út og inn. En hann þarf líka að glíma við sína eigin drauga.

Kynnir hátíðarinnar, Ragnar Ísleifur Bragason, segir að hátiðin hafi verið vel lukkaða og undir það tekur Alda Davíðsdóttir, sem var einn af skjaldborgarstjórunum á Patreksfirði - hún segir hátíðina hafa verið álíka fjölsótta og síðustu ár.

Hér má nálgast vefsíðu hátíðarinnar.