Andrea Maack Parfums í Kronkron

Ilmvötn Andreu Maack hafa víða vakið athygli síðustu ár. Þau eru seld í þekktum verslunum á við Harvey Nichols í London, Printemps í París og Storm í Kaupmannahöfn.

Frá næstu mánaðarmótum verða ilmötn Andreu Maack einnig fáanleg í versluninni Kronkron við Laugaveg. Af því tilefni verður haldið teiti í Kronkron á fimmtudaginn milli klukkan 19 og 21.

Ilmir Andreu þykja heillandi en hún gerir þá í samvinnu við ilmvatnsgerðamenn í Frakklandi. Nálgun Andreu við gerð ilmvatnana er óvenjuleg en þau eiga rætur sínar í myndlistarverkum hennar og hugmyndum.

Með þessu móti hefur Andrea leitt saman sín helstu hugðarefni. Annarsvegar ástríðu hennar fyrir tísku og fagurfræði og hinsvegar myndlist en Andrea er myndlistarkona og útskrifaðist úr Listaháskóla Íslands árið 2005.

Ilmvötnin sem eru skilgreind sem "wearable art" eiga því hvert um sig sögu sem tengist verki eða sýningu sem Andrea hefur staðið að.

Í dag eru ilmirnir fimm: Smart, Craft, Sharp, Silk og Dark. Þeir eru ætlaðir báðum kynjum og eru búnir til úr bestu mögulegu hráefnum.

Kronkron býður alla hjartanlega velkomna að koma á fimmtudag til að kynnast þessum heillandi ilmum. Hægt er að kynnast þeim nánar á heimasíðu Andrea Maack. Nánari upplýsingar um teitið er að finna á Facebook-síðu Kronkron.