Liverpool tók nýkrýnda bikarmeistara Chelsea í kennslustund

Liverpool hefndi fyrir tapið á móti Chelsea í bikarúrslitaleiknum á Wembley á laugardaginn með því að rúlla yfir nýkrýnda bikarmeistara á Anfield í kvöld. Liverpool vann leikinn 4-1 og er nú aðeins einu stigi á eftir nágrönnunum í Everton fyrir lokaumferðina.

Liverpool skoraði þrjú mörk á átta mínútna kafla í fyrri hálfleik og gat líka leyft sér að klikka á vítaspyrnu í uppbótartíma fyrri hálfleiks. Liverpool nýtti sér vel að Roberto di Matteo, stjóri Chelsea, stillti upp hálfgerðu varaliði í leiknum og John Terry, fyrirliði Chelsea,  átti einn sinn versta leik í manna minnum.

Það voru aðeins þrír leikmenn Chelsea sem héldu sæti sínu í byrjunarliðinu frá því í bikarúrslitaleiknum á laugardaginn; John Terry, Branislav Ivanovic og Ramires. Þeir eiga það allir sameiginlegt að vera í leikbanni í úrslitaleik Meistaradeildarinnar. Liverpool gerði fjórar breytingar og Andy Carroll kom meðal annars inn í liðið en Steven Gerrard var aftur á móti ekki í hóp.

Ross Turnbull var í marki Chelsea í fyrsta sinn í deildarleik í tvö ár, Ashley Cole, Frank Lampard og Juan Mata byrjuðu allir á bekknum  en Didier Drogba var ekki í hóp.

Luis Suarez átti fyrsta markið sem kom á 20. mínútu. Hann klobbaði þá John Terry, fyrirliða Chelsea, í annað skiptið á stuttum tíma og komst upp á endamörkum. Suarez gaf boltann fyrir og Michael Essien sendi boltann í eigið mark.

John Terry gerði önnur mistök í öðru markinu sem kom fimm mínútum síðar. Terry rann þá á hausinn og Jordan Henderson komst einn í gegn og skoraði.

Daniel Agger skoraði síðan þriðja mark Liverpool á aðeins átta mínútum þegar hann skallaði inn skallasendingu Andy Carroll eftir hornspyrnu frá Jonjo Shelvey.

Andy Carroll fékk síðan víti í uppbótartíma fyrri hálfleiks en Stewart Downing skaut í stöngina og hefur því enn ekki náð að opna markareikning sinn hjá Liverpool í ensku úrvalsdeildinni.

Ramires minnkaði muninn í 3-1 á 50. mínútu þegar hann fékk aukaspyrnu Florent Malouda í sig. Jonjo Shelvey bætti hinsvegar við fjórða marki Liverpool á 61. mínútu með laglegu langskoti eftir misheppnað útspark Ross Turnbull.

Liverpool fékk fullt af færum til að bæta við mörkum í seinni hálfleiknum en Chelsea slapp með 4-1 tap.