Frábær fyrri hálfleikur ekki nóg fyrir Arsenal | AC Milan fór áfram 4-3

Arsenal er úr leik í Meistaradeildinni þrátt fyrir frábæran 3-0 sigur á ítalska liðinui AC Milan á Emirates leikvanginum í kvöld. AC Milan vann fyrri leikinn 4-0 og þar með 4-3 samanlagt. Arsenal skoraði þrjú mörk í frábærum fyrri hálfleik en tókst ekki að bæta við mörkum í þeim seinni.

Arsene Wenger stillti upp sókndjöfru liði og Arsenal byrjaði leikinn mjög vel. Arsenal-menn fengu síðan sannkallaða draumabyrjun þegar Laurent Koscielny skallaði inn hornspyrnu Alex Oxlade-Chamberlain eftir aðeins sjö mínútna leik.

Tomás Rosicky kom Arsenal síðan í 2-0 á 26. mínútu eftir að Thiago Silva mistókst illilega að hreinsa frá eftir misheppnaða fyrirgjöf Theo Walcott. Allt í einu var Arsenal komið í allt aðra og betri stöðu.

Þetta var sannkallaður draumahálfleikur fyrir Arsenal því Robin van Persie kom liðinu í 3-0 með marki úr vítaspyrnu á 43. mínútu en Alex Oxlade-Chamberlain fékk vítið. Arsenal hafði því meira en einn hálfleik til að bæta við fjórða markinu og jafna metin í einvíginu.

Arsenal fékk tækifæri til að bæta við fleiri mörkum í seinni hálfleik en eins gátu leikmenn AC Milan einnig skorað og gert út um einvígið. Ekkert mark leit þó dagsins ljós og AC Milan slapp með skrekkinn.