Gríntvíeyki aftur saman

Stephen Fry og Hugh Laurie eru byrjaðir að vinna saman á nýjan leik. Þeir slógu í gegn á BBC í Bretlandi með gamanþáttunum A Bit of Fry & Laurie á árunum 1989 til 1995 og léku einnig saman í Jeeves and Wooster.

„Ég og Hugh Laurie erum að vinna að verkefni saman. Afsakið hvað ég er leyndardómsfullur en ég læt ykkur vita meira um leið og ég get,“ sagði Fry á Twitter-síðu sinni. Fry stjórnar spurningaþættinum QI á meðan Laurie er launahæsti leikarinn í bandarísku sjónvarpi. Hann lauk nýverið við að leika í síðustu þáttaröðinni af hinum vinsælu læknaþáttum House.