Depp ættleiddur

Leikarinn Johnny Depp var ættleiddur af Comanche-indíánum frá Nýju Mexíkó og tilheyrir nú flokki þeirra.

Ættleiðingin á rætur sínar að rekja til þess að Depp leikur indíánann Tonto í kvikmynd byggðri á sjónvarpsþáttunum The Lone Ranger.

LaDonna Harris, Comanche-indíáni og formaður samtakanna Americans for Indian Opportunity, sagði ættbálkinn stoltan af hinum nýja meðlimi. „Við höfðum samband við Depp að fyrra bragði og hann tók vel í hugmynd okkar. Hann virtist ánægður með boðið og við erum upp með okkur yfir því hversu spenntur hann er.“

Depp sagði í viðtali árið 2011 að svolítið af indíánablóði rynni í æðum hans og að langamma hans væri líklega af Cherokee eða Creek-indíánaættum.