Vegagerðin: Vindhviður undir Hafnarfjalli geta orðið allt að 45 m/s

Fljótlega hvessir af S og SSA, einkum um landið vestanvert, en reiknað er með 20-25 m/s í lofti um mest allt land til morguns samkvæmt tilkynningu frá Vegagerðinn. Gera má ráð fyrir vindhviðum undir Hafnarfjalli allt að 40-45 m/s. og víða á norðanverðum Snæfellsnesi þar til í fyrramálið að það tekur að lægja.

Eins má reikna með snörpum hviðum við Hnífsdal og Arnardal á Súðavíkurvegi frá því um kl. 19 til 20. Eins á Siglufjarðavegi frá sama tíma m.a. í Fljótum og við Sauðanesvita.

Vegir eru auðir á Suður- og Suðausturlandi. Þoka er á Hellisheiði og Þrengslum. Á Vesturlandi er óveður undir Hafnarfjalli, á norðanverðu Snæfellsnesi, Fróðárheiði og Holtavörðuheiði.

Á Vestfjörðum er krapi í Ísafjarðardjúp, á Hálfdán og Dynjandisheiði. Þæfingsfærð og skafrenningur er á Hrafnseyrarheiði. Hálka er svo á Steingrímsfjarðarheiði og hálkublettir um Þröskulda.

Vegir eru að mestu auðir á Norðurlandi en þó eru hálkublettir á Öxnadalsheiði og Mývatnsöræfum en hálka á Hólasandi.

Á Austurlandi eru hálkublettir á Möðrudalsöræfum en vegir annars greiðfærir.