Útgerðamenn ætla að berjast gegn kvótafrumvarpi

Útgerðarmenn ætla að berjast gegn hinum umdeildu kvótafrumvörpum ríkisstjórnarinnar og finna þeim flest til foráttu. Verið sé að færa vinnu frá atvinnumönnum í hobbístarfsemi, draga úr hagræðingu, sérhæfingu, uppbyggingu og skerða afkomu og tekjur þjóðarinnar af auðlindinni.

Efnisatriði kvótafrumvarpanna eru tekin að skýrast. Samkvæmt heimildum fréttastofu er reiknað með 70% hækkun á veiðigjaldi í minna frumvarpinu, sem skiptist þannig að 80% renni í ríkissjóð en 20% til sveitarfélaga við sjávarsíðuna. Strandveiðikvótinn stækkar og hámark á byggðakvóta fer úr 5000 tonnum í 17 þúsund tonn. Reiknað er með að litla frumvarpið geti tekið gildi strax í haust.

Bitbeinin eru í stóra frumvarpinu. Þar er lagt til að veiðigjaldið hækki um 100% - helmingur þess rynni í ríkissjóð, 30% til sjávarbyggða og 20% til að efla nýsköpun og rannsóknir í sjávarútvegi.

Eftir 15 ár verður útgerðum bannað að kaupa og selja kvóta - þangað til hafi ríki og sveitarfélög forgangsrétt til að kaupa.

Útgerðirnar eiga síðan að gera 15 ára samning við ríkið um leyfi til að nýta kvótann - og þar með er klippt á hugsanlegan eignarrétt útgerðanna á kvótanum.

Fyrningin í þessu frumvarpi fer eftir fiskistofnum. Fimmtán prósent af öllum kvóta - nema þorski, ufsa, steinbít og ýsu - verður á næstu 15 árum tekinn til ríkisins og hann síðan leigður út.

Þorskkvótinn var verulega skertur árið 2007 með svartri skýrslu Hafró - og heildarafli sem má veiða úr sjó hefur verið í sögulegu lágmarki. Í frumvarpinu er því lagt til að þegar heildarkvótinn stækkar - þegar veiða má fleiri tonn úr sjó - þá fari 55% af aukningunni til kvótahafa en 45% fari til ríkisins sem útdeili þeim síðan.

Framkvæmdastjóri LÍÚ telur allar þessar hugmyndir afturför. Hann fullyrðir að tvöföldun á veiðigjaldi myndi ásamt tekjuskatti hirða helminginn af hreinum hagnaði útgerðanna. Kvótasala hafi verið drifkrafturinn í hagræðingu útgerðanna - nú eigi að banna hana.

Framkvæmdastjóri Vinnslustöðvarinnar líkir 15 ára nýtingarsamningnum við að bæjarstjórinn í Eyjum tilkynnti bæjarbúum einn daginn að nú ætti að stytta notkunartíma lóða niður í 15 ár: