Úr klóm talíbana og tígra í ró upp á Skaga

Indverski ævintýramaðurinn Somen Debnath lagði af stað hjólandi frá heimabæ sínum Bengali á Indlandi í maí 2004 og hvílir sig nú hjá vinafólki á Akranesi eftir að hafa farið íslenskra landshorna á milli undanfarna daga.

Ýmislegt hefur á daga hans drifið þessi sjö ár þar sem talíbanar, blettatígur og nýnasistar koma við sögu. En fyrst vildi Fréttablaðið fræðast um erindi hans hingað. „Ég vil fá fólk til að huga að því hvernig það getur lagt sitt af mörkum til að gera lífið betra fyrir meðbræður sína og -systur,“ segir hann.

„Markmiðið er að ferðast um heiminn til ársins 2020 en þá vil ég virkja fjölmenningarlegt samfélag sem myndi búa í þorpi nálægt mínum heimahögum sem væri haldið gangandi með sjálfboðavinnu þannig að þar væri hægt að reka spítala og koma heimilislausum undir þak og þar yrði einnig unnið að öðrum góðum málum til að gera heiminn enn betri.“

Debnath hefur farið um 80 þúsund kílómetra og þrætt um 60 lönd. Virðist ætla að sannast hið fornkveðna að fall sé faraheill því ýmislegt gekk á í upphafi ferðar. „Strax á öðrum degi var ég á ferð á fáförnum slóðum en hitti þar veiðimenn sem ráðlögðu mér að vera ekki þar á ferð þar sem blettatígrar væru á ferðinni. Það reyndist rétt því síðar þóttist ég heyra í þessum skepnum svo ég klifraði upp í tré og viti menn! Þá sé ég fjóra blettatígra fyrir neðan mig. Þeir komu að og fóru að hnusa af bakpokanum mínum sem var þarna fyrir neðan. Þetta var að kvöldi til svo ég mátti dúsa uppi í tré fram á morgun eða í ellefu klukkustundir, þá fyrst var óhætt að fara niður.“

En ekki er öll vá af dýravöldum. „Ég var síðan tekinn af talíbönum þegar ég var á leiðinni frá Kabúl til Írak. Þeir bundu fyrir augu mín og fóru með mig í eitthvað neðanjarðarvirki. Þar létu þeir mig dúsa í fjóra daga. Síðan var ég yfirheyrður og spurður hvað mér þætti um talíbana, íslam og Kóraninn. Síðan spurðu þeir hvað ég ætlaðist fyrir ef þeir létu mig lausan. Ég sagðist ekki geta unnið nein ofbeldisverk en að öðru leyti væri ég til í að hjálpa þeim. Þá var ég látinn elda og mæltist maturinn svo vel fyrir að ég var kokkur þeirra í níu daga en þá létu þeir mig lausan.“ Hann segist einnig hafa orðið fyrir verulegum ónotum af nýnasistum í Austur-Evrópu. „Náttúran er svo undarleg að þegar ég kemst í þessar þrautir verður það bara til þess að ég fæ meiri trú á styrk mínum,“ segir hann.

Hann hyggst nú fara til Nuuk á Grænlandi en það er þó einhverjum vandkvæðum háð og því leitar hann eftir stuðningi á þeim áformum. Þeim sem vilja fylgjast með ferðum hans eða styðja hann er bent á heimasíðuna somen2020world.com.

jse@fettabladid.is