Þrumufótur sparkar fast - ný risaeðlutegund finnst

Vísindamen hafa uppgötvað nýja tegund af risaeðlu sem þeir nefna Þrumufót vegna þess hversu kröftuga lærvöðva þeir telja að hún hafi haft. Steingervingur af risaeðlunni sem fannst í námu í Utah var brotakenndur en þó nógu heillegur til að rannsakendur gætu séð að skepnan bjó yfir óvenju öflugum fótabúnaði.

Nýja tegundin, sem lýst er í Acta Palaeontologica Polonica tímaritinu, er graseðla en þær eru með langan háls og hala og voru áberandi á júratímanum.

Tveir steingervingar af þrumufætinum hafa fundist en þeir eru taldir vera um 110 milljón ára gamlir og mögulega af móður og afkvæmi. Fullvaxið hefur dýrið líklega verið um 6 tonn á þyngd og 14 metrar á lengd. Það sem vakti athygli vísindamanna var hins vegar stærð og lögun mjaðmabeinsins sem benti til sterkra lærvöðva.

„Ef að rándýr væru á eftir Þrumufætinum gæti hann einfaldlega sparkað þeim í burtu," segir Mike Taylor, Doktor frá University College London, í viðtali við BBC.

Samkvæmt Taylor er mögulegt að skepnan hafi hafst við í hrjóstugu fjalllendi og aflmiklir leggir hafi nýst sem nokkurs konar fjórhjóladrif fyrir þessa áður óþekktu risaeðlutegund.