Eignarnám HS Orku er ekki á dagskránni

Orkumál Eignarnám ríkisins á HS Orku er ekki á dagskrá, samkvæmt áfangaskýrslu starfshóps um lagaramma orkuvinnslu sem iðnaðarráðherra kynnti ríkisstjórn í gær. Ríkisstjórnin hefur falið iðnaðarráðherra, í samstarfi við fjármálaráðherra, að taka upp viðræður við HS Orku, eigendur félagsins og hlutaðeigandi sveitarfélög um styttingu leigutíma nýtingarréttar fyrirtækisins. Lögð er áhersla á að tryggja ríkinu ótímabundinn forkaupsrétt á hlutum Magma Energy Sweden í HS Orku. „Jafnframt er lögð áhersla á að samið verði um kaup opinberra aðila og innlendra aðila eins og lífeyrissjóða á hlutum í HS Orku,“ segir í tilkynningu ríkisstjórnarinnar. Þar kemur einnig fram að ákveðið hafi verið að ganga til samninga við Reykjanesbæ um kaup á jarðauðlindum. Samtök atvinnulífsins hafa á vef sínum eftir Ásgeiri Margeirssyni, stjórnarformanni HS Orku, að orðspor Íslands meðal erlendra fjárfesta fari versnandi vegna pólitískrar óvissu og umræðu um þjóðnýtingu. Nú sé svo komið að menn velti fyrir sér kaupum á tryggingum fyrir pólitískum upphlaupum líkt og tíðkist í ríkjum þar sem stjórnarfar sé óstöðugt og leikreglur í viðskiptum óskýrar. Katrín Júlíusdóttir iðnaðarráðherra áréttar að Ísland sé vestrænt réttarríki með stjórnarskrárvarin réttindi. „Gegn þeim verður aldrei gengið nema löggjafinn hafi skilgreint skýra almannahagsmuni sem heimila svo alvarlega aðgerð,“ segir hún og bendir á að umræða sem hér hafi orðið um eignarnám stafi af því að í skýrslu nefndar um orku- og auðlindamál sé setning sérstakra laga um eignarnám HS Orku nefnd sem önnur þeirra leiða sem til greina gætu komið. Þar sé hins vegar ekki mælt með henni, heldur leiðin reifuð lögfræðilega sem kostur. Katrín segir niðurstöðu starfshópsins sem nú hafi skilað áliti alveg afdráttarlausa hvað það varði, að við óbreytt fyrirkomulag orkumála verði ekki farið í eignarnám. Hún segir að í heitum umræðum um yfirráðarétt þjóðarinnar á auðlindum sínum hafi verið gengið á stjórnmálamenn og þeir spurðir hvort þeir útilokuðu eignarnám. Hún segir hins vegar engan geta útilokað það, væri um þjóðarhagsmuni að tefla. „Við slíkar aðstæður hlytu almannahagsmunir að lokum að ráða. En þetta hefur verið blásið upp að ósekju að mínu mati. Nú liggur fyrir að eignarnám er ekki á dagskránni heldur erum við að fara í samninga sem munu tryggja aðkomu hins opinbera að fyrirtækinu og vonandi sátt um auðlindanýtinguna,“ segir hún.olikr@frettabladid.is