Endurheimti stolið veski 40 árum síðar

Rudolph Resta, sem starfaði hjá The New York Times, varð heldur betur undrandi á dögunum þegar veski, sem hann átti, skilaði sér aftur til hans. Það væri varla frásögum færandi nema að veskinu hans var stolið 40 árum áður.

Rudolph hafði verið að vinna á dagblaðinu heimsfræga þegar hann skildi jakkann sinn eftir í fataskáp í húsnæði blaðsins nærri Times Torgi fyrir 40 árum síðan. Þegar hann vitjaði jakkans eftir vinnudaginn var veskið hans horfið.

Það var svo fyrir stuttu sem öryggisvörður var á eftirliti í sama húsi sem hann sá að eitthvað hafði fallið í bilið á milli gluggakarms og gluggans. Þar var veskið. Öryggisvörðurinn fletti svo upp nafni eigandans í gegnum starfsmannaskrár blaðsins.

Þegar Rudolph fékk loksins veskið í hendurnar var allt fé horfið úr því. Aftur á móti var þar að finna gamlar myndir af fjölskyldu Rudolphs sem honum þótti vænt um að endurheimta.