Leikskólakennarar halda tónleika til styrktar sveitarfélögunum

Mikið þarf til að afstýra verkfalli leikskólakennara næstkomandi mánudag segir formaður þeirra. Félagið stendur fyrir söfnunartónleikum til styrktar sveitarfélögunum í kvöld. Reynt verður til þrautar að finna lausn á deilunni á fundi hjá ríkissáttasemjara á morgun.

Fulltrúar leikskólakennara og sambands íslenskra sveitafélaga funduðu í húsnæði ríkissáttasemjara í morgun en án árangurs. Formaður félags leikskólakennara sagði engar tillögur hafa verið kynntar á fundinum og því engin sátt í sjónmáli.

Ríkissáttasemjari sagði fundinn í dag mjög jákvæðan og því hafi verið boðað til annars fundar á morgun, fundað verður á meðan sáttatónn er í samningsaðilum. Hann gat þó ekki sagt til um hvort að tilboð myndi þá liggja fyrir.

Í kvöld ætla leikskólakennarar og stuðningsmenn þeirra að standa fyrir styrktartónleikum fyrir sveitafélögin

„Við ætlum að leggja okkar af mörkum og safna peningum til þess að sveitafélögin geti greitt leikskólakennurum laun miðað við ábyrgð," segir Haraldur Freyr Gíslason, formaður félags leikskólakennara.

Haraldur segir tónleikagesti eiga von á heljarinnar húllumhæ í kvöld en tónleikarnir hefjast klukkan tíu og meðal tónlistarmanna verða Páll Óskar, Mugison, Dikta, Jón Jónsson og Friðrik Dór svo nokkrir séu nefndir. Haraldur segir stuðning almennings við málstað leikskólakennara hafa verið ómetanlegan til dæmis hafi 93 prósent svarenda í viðhorfskönnun MMR verið fylgjandi því að hækka laun leikskólakennara svo ekki komi til verkfalls.

„Það er enginn smá stuðningur og við erum svo þakklát fyrir þennan stuðning, hann skiptir okkur svo miklu máli, bara takk," segir Haraldur að lokum.