Pýramídinn mikli í Giza lokaður vegna 11.11.11

Yfirvöld í Egyptalandi lokuðu fyrir aðgang að Pýramídanum mikla í Giza í dag. Sögusagnir voru um að nokkrir hópar hefðu skipulagt helgiathafnir í pýramídanum í tilefni af einkennilegri dagsetningu - 11.11.11.

Eftir að sögusagnirnar komust í hámæli kröfðust margir þess að Pýramídanum mikla yrði lokað í dag.

En talsmaður Umboðsskrifstofu forngripa í Egyptalandi sagði að lokunin kæmi einungis til vegna viðhaldsverkefna á pýramídanum.

Pýramídinn mikli í Giza er sá stærsti í Egyptalandi. Af sjö undrum veraldar er pýramídinn sá eini sem enn stendur. Hann geymir grafhvelfingu faraósins Khufu.

Samkvæmt AP fréttastofunni voru miklar öryggisráðstafanir í kringum pýramídann í dag.

Ali al-Asfar, stjórnandi pýramídanna í Giza, sagði að ekkert óvanalegt hefði gerst í dag og að þegar klukkan sló ellefu mínútur yfir ellefu hefði allt verið með kyrrum kjörum.

Talnaspekingar hafa beðið dagsins með óþreyju en margir telja dagsetninguna 11.11.11 hafa sérstaka þýðingu.