Dráttartaug komin í Ölmu - mikill viðbúnaður á svæðinu

Dráttartaug hefur nú verið komið á ný milli flutningaskipsins Ölmu og togskipsins Hoffells. Taugin slitnaði um ellefuleytið í morgun, og hefur síðan verið unnið að því að koma henni fyrir aftur. Það tókst laust fyrir klukkan fjögur í dag og er nú stefnan tekin á Reyðarfjörð.

Mikill viðbúnaður er á svæðinu, enda fer veður versnandi þar og full ástæða til að vera við öllu búinn. Þyrlur Landhelgisgæslunnar TF-LIF og TF-GNÁ eru báðar í viðbragðsstöðu, önnur á Höfn í Hornafirði og hin í Reykjavík.

Varðskipið Þór var sent af stað frá Reykjavík í dag. Gert er ráð fyrir að siglingin taki um 15 klukkustundir. Skipið verður því ekki komið á staðinn fyrr en í fyrramálið.

Þá var varðskipið Ægir einnig sent af stað og verður til taks austur af Stokknesi.

Alma er 100 metra flutningaskip, skráð á Kýpur. Skipið lenti í vandræðum í nótt þegar stýribúnaður þess virkaði ekki. Í dag hafa staðið yfir umfangsmiklar björgunaraðgerðir, sem á margan hátt hafa gengið fremur brösuglega. Meðal annars slitnaði dráttartaug sem komið hafði verið fyrir í Ölmu. Þá ollu tungumálaörðugleikar því að erfitt var að liðsinna áhöfn skipsins. Og þá hefur veðrið ekki bætt úr skák.