Helgi segist ekki hafa gengið of langt í gagnrýni á Bankasýsluna

Helgi Hjörvar, formaður efnahags- og viðskiptanefndar Alþingis, segist ekki hafa gengið of langt í gagnrýni sinni á stjórn bankasýslu ríkisins. Stjórnin sagði af sér í gær en Helgi segir nauðsynlegt að endurreisa trúverðugleika stofnunarinnar. Þingmaður Sjálfstæðisflokks vill hins vegar að hún verði lögð niður.

Stjórn bankasýslu ríkisins fór þess á leit við fjármálaráðherra í gær að vera leyst frá störfum vegna þeirrar umræðu sem hefur skapast í kringum ráðningu Páls Magnússonar í starf forstjóra. Í bréfi sem stjórnin sendi ráðherra kemur fram að umræðan hafi vegið að trúverðugleika stofnunarinnar og rofið friðinn um starfsemi hennar. Var sértaklega vísað í viðbrögð alþingismanna í þessu samhengi en Helgi Hjörvar, formaður efnahags- og viðskiptanefndar Alþingis sagði að ráðningin væri hneyksli. Helgi segist ekki hafa gengið of langt í gagnrýni sinni.

„Það er hlutverk mitt sem alþingismaður að gagnrýna það ef mistök eru gerð. Ef athafnir manna þola ekki þá gagnrýni bendir það til þess að þær gjörðir hafi ekki verið byggðar á traustum grunni."

Helgi segir það vera næsta verkefni að endurreisa trúverðuleika stofnunarinnar, trúverðugleika sem stofnunin hafi tapað. Hann segir að sá trúverðugleiki hafi ekki tapast vegna umræðunnar um málið.

Tryggvi Þór Herbertsson, þingmaður sjálfstæðisflokks, segir að bankasýslan hafi verið stofnuð til að koma í veg fyrir afskipti stjórnmálamanna að bönkunum. Umræðan í kringum ráðningu Páls hafi hins vegar sýnt að ekki hafi tekist að uppfylla það markmið. Hann vill að fjármálaráðuneytið taki yfir verkefni stofnunarinnar.

„Ég tel að þetta sé alveg óþarfa milliliður við sjáum það núna að þessi upphaflega hugmynd um armslengdarsjónarmið það er ekki nóg fyrir pólitíkusana. þeir eru tilbúnir að ganga ansi langt til að skipta sér af málum bankasýslunnar og ég held að nú sé góður tími til að leggja hana niður," segir Tryggvi.

Hann vill að fjármálaráðuneytið taki yfir verkefni stofnunarinnar.