Sogn var upphaflega barnaheimili

Réttargeðdeildinni á Sogni verður lokað og starfsemi hennar flutt í stærra húsnæði á Kleppi. Tvöföld öryggisgirðing er meðal þess sem reisa þarf við Klepp áður en nýja deildin opnar.

Húsnæði deildar tólf á Kleppi hefur staðið autt í hálft annað ár, og þangað flytur réttargæsludeildin þann 1. mars.

Á Kleppi er þegar öryggisgæsludeild en yfir henni er sami yfirlæknir og á réttargeðdeildinni.

„Við sjáum þarna möguleika á að bæta þjónustu og styrkja hlutverk deildarinnar sem réttargæsludeildar á sama tíma og við náum fram ákveðinni fjárhagslegri hagræðingu sem vissulega er mikilvægt á þessum tíma. En það eru fyrst og fremst fagleg rök fyrir því og þrýstingur," segir Páll Matthíasson, geðlæknir og framkvæmdastjóri geðsviðs Landspítalans.

Sogn var upphaflega byggt sem barnaheimili og hefur húsnæðið lengi þótt henta illa fyrir réttargeðdeild.

„Auk þess sem það öryggi sem felst í því að vera lengst úti í sveit er falskt. Vegna þess að það getur ýmislegt komið upp á og þá er betra, eins og við náum á Kleppi, að hafa þessa deild við hliðina á öryggisgæsludeild, deild 15, sem í rauninni sinnir fólki af svipuðu tagi. Það er fólki sem hefur sögu um alvarlega geðsjúkdóma, fíkniefnavanda og ofbeldi," segir Páll.

Nokkrar breytingar verða gerðar við Klepp áður en nýja deildin opnar. Deildin verður með sér inngang sem er bakatil. Síðan verða reistar tvær öryggisgirðingar, önnur gegnsæ, um fimm metra há, og hin rammgerðari nokkru utar.

„Þarna á Kleppi, í miklu stærra húsnæði, höfum við strax svigrúm til að fjölga strax rúmum töluvert. Og enn meira svigrúm til að auka við ef þörf krefur," segir Páll.

Starfsfólki á Sogni var tilkynnt um breytinguna í morgun. Því verður öllu sagt upp en því boðið nýtt starf á Kleppi. Flutningur starfseminnar hefur verið nokkuð gagnrýndur, bæði af Samtökum sunnlenskra sveitarfélaga og þingmönnum kjördæmisins, með hliðsjón af byggðarsjónarmiðum. Með breytingunni flytjast ríflega þrjátíu störf af landsbygðinni og til höfuðborgarinnar.

Páll segir hagsmuni vistmanna á Sogni vera setta í fyrsta sæti og hagur þeirra sé mikilvægari en byggðarsjónarmið.