Íhugar að láta af störfum vegna lélegra kjara

Lögreglumaður, sem elskar starf sitt, segist íhuga að láta af störfum vegna lélegra kjara og lítilsvirðandi viðmóti ríkisvaldsins.

Lögreglumenn stóðu í ströngu í mótmælunum árið 2008 og þurftu meðal annars að verja Alþingi og þá þingmenn sem þar sátu.

Ef að líkum lætur munu þingmenn þurfa að treysta aftur á þjónustu lögreglunnar næstkomandi laugardag þegar Alþingi verður sett, en tæplega tvö þúsund manns hafa nú þegar boðað sig á mótmæli fyrir utan þingið.

En hvaða viðmóti mættu lögreglumenn frá þingmönnum fyrir þremur árum?

„Að mínu mati stóðum við í tveimur bardögum, einum hérna úti og einum inni. Við fengum ekki að framkvæma þær aðgerðir sem við höfðum kosið að framkvæmda vegna andmæla þingmanna," segir Gestur Pálmason, lögreglumaður.

En urðu margir lögreglumenn fyrir meiðslum í mótælunum 2008?

„Já, ég á félaga sem varð fyrir alvarlegum höfuðmeiðslum. Það er ekki bara líkamlegi þátturinn heldur líka andlegi þátturinn, það eru menn sem eru ekki enn búnir að vinna á honum í dag," segir Gestur.

Lögreglumönnum stendur til boða sálfræðihjálp sem þeir þurfa að sækja sjálfir. Gestur er á því að betur megi standa að þessum málum.

„Helst vildi ég sjá einhvern í fullu starfi hjá lögreglunni að fylgjast með andlegu hliðinni," segir hann.

Heyrst hefur að margir lögreglumenn íhugi að segja upp störfum eftir niðurstöðu gerðardóms sem kynnt var í gær.

„Ég hef lýst því tvívegis yfir að ég sé tilbúinn að yfirgefa starfið," segir hann og bendir á að sjálsvirðingin sé ekki mikil vegna lélegra kjara.