Ný námsleið fyrir heyrnarlausa

Ný námsleið sem verður sniðin að þörfum heyrnarlausra verður tekin upp í byrjun næsta árs hjá Mími-símenntun. Sjálfstyrking verður stór hluti af náminu.

Í dag er Alþjóðlegur dagur heyrnarlausra og í tilefni af honum var ákveðið að kynna fyrirhugaða námsleið fyrir heyrnarlausa, sem hefur göngu sína í janúar á næsta ári.

Hjördís Anna Haraldsdóttir, sem er heyrnarlaus, segir leiðina eiga eftir að gagnast mörgum, og sérstaklega þeim sem eldri eru. Táknmálstúlkar hafi ekki komið til sögunnar fyrr en árið 1997 og því hafi margir heyrnarlausir farið á mis við grunnmenntun.

„Ég er ofasalega jákvæð. Ég hef svona aðeins kíkt á það hvernig þetta er byggt upp og ég hugsa að þetta sé mjög góður grunnur. Og þarna fá döff tækifæri til að ná sér í menntun til að koma sér á sinn stað í lífinu og auka sína þekkingu, afla sér viðbótarþekkingar," segir Hjördís Anna.

Það var Anney Þórunn Þorvaldsdóttir, verkefnastjóri hjá Mími símenntun, sem fékk hugmyndina að leiðinni en hana verður hægt að sækja í húsakynnum Mímis. Allir heyrnarlausir átján ára og eldri geta sótt um en kenndar verða almennar bóklegar greinar.

„Það er náttúrulega ofboðslega vont að fara í gegnum lífið og halda að maður geti ekki lært af því að maður hefur slæma reynslu af skólagöngu, því það geta allir lært. Það þarf bara að beita réttu aðferðunum og fjölbreyttum aðferðum," segir Anney Þórunn.

Þú telur að það sé þörf á þessu?

„Ekki spurning. Ég trúi því að þetta muni styrkja þennan hóp, námslega séð og líka bara sem einstaklinga þannig að sjálfstyrking verður svona mjög stór hluti af náminu, þannig að þeir geti mögulega farið áfram í eitthvað annað nám eftir þetta," segir hún.