Bóndi ákærður fyrir að veitast að lögreglumanni með naglaspýtu

Bóndi á sjötugsaldri hefur verið ákærður fyrir brot gegn valdstjórn þegar hann á að hafa veist að lögregluvarðstjóra sem var að liðsinna fulltrúa sýslumannsins í Reykjavík í apríl á síðasta ári.

Fulltrúinn hugðist gera dráttarvél upptæka sem bóndinn, sem er búsettur í Kjósarhreppi, hafði ekki greitt af í nokkurn tíma.

Í ákæruskjali er bóndinn sakaður um að hafa nálgast fulltrúann trylltur í framkomu og varnað þeim aðgang að dráttarvélinni.

Í bloggi, sem bóndinn hélt úti, skýrði hann út sína hlið á málinu.

Þar skrifaði hann:

„[...] mótmælti ég gerningnum og neitaði að afhenda vélina og stóð ég í orðaskaki við fulltrúa sýslumanns og bað hann að koma með mér inn í hús og skoða með mér samninginn þar sem ég gat sýnt honum fram á að ég hafði staðgreitt dráttarvélina. En allt kom fyrir ekki og upphófst orðaskak sem leiddi til þess að lögregluþjónn með lágt gáfnafar fór að blanda sér í málin og hótaði hann mér að setja mig í járn ef ég hætti ekki að hindra réttvísina og skipti þá engum togum að hann ræðst á mig og ætlar að járna mig en hafði ekki afl í það. Hann hafði greinilega misreiknað gamla manninn og greinilega gleymt að taka lýsi í gegnum tíðina eins og gamli. Allavega réði hann ekki við mig og varð fljótt undir og æpti heil ósköp og bað um hjálp sem hann og fékk frá vinum sínum frá vörslusviptingu og sýslumanni, einir fjórir þungir kallar, eftir mikil átök tókst þeim að hafa gamla undir og járna hann. Síðan sátu þrír af þeim ofan á mér á meðan beðið var eftir liðsauka frá Reykjavík sem birtust eftir um það bil þrjú korter og þá tveir bílar með tveimur mönnum í hvorum bíl og tveimur mótorhjólum."

Bóndinn er meðal annars ákærður fyrir að hafa ógnað varðstjóranum með veiðihnífi og reynt að veitast að honum með naglaspýtu. Auk þess sem hann er sakaður um að hafa hótað honum lífláti.

Bóndinn mætti í þingfestingu málsins í Héraðsdómi Reykjavíkur í morgun og neitaði alfarið sök. Aðalmeðferð fer fram í málinu í byrjun október.