Telur heimildir ráðherra kunna að brjóta í bága við stjórnarskrána

Umboðsmaður Alþingis tekur ekki afstöðu til kvörtunar Samtaka verslunar og þjónustu vegna meðferðar sjávarútvegs- og landbúnaðarráðuneytisins á úthlutunum tollkvóta til innflutnings á landbúnaðarvörum.

Ástæða þessa er að hann telur að þær heimildir sem ráðherra eru veittar af Alþingi kunni að brjóta í bága við stjórnarskrána.

Umboðsmaður Alþingis beinir því til ráðuneytisins, og eftir atvikum fjármálaráðherra, að bregðast við þeirri niðurstöðu að viðkomandi ákvæði tollalaga um framleiðslu, verðlagningu og sölu búvara séu ekki í samræmi við stjórnarskrána.

Þá hefur umboðsmaður ákveðið að tilkynna Alþingi um málið.

Sjávarútvegs- og landbúnaðarráðuneytið birti hins vegar tilkynningu á vef sínum í morgun um þetta álit umboðsmanns Alþingis.

Þar segir orðrétt: „Í áliti sínu staðfestir umboðsmaður að framkvæmd ráðherra er í samræmi við sett lög en tilefni álitsgerðarinnar er einmitt kæra Samtaka verslunar og þjónustu þar sem því er haldið fram að ráðuneytið hefði í reglugerðum farið út fyrir valdheimildir tollalaga nr. 88/2005."

Túlkun ráðuneytisins samkvæmt tilkynningunni virðist því ekki í samræmi við álit umboðsmannsins. Fréttastofa hefur þegar óskað nánari skýringa frá ráðuneytinu.

Uppfært:



Fréttatilkynning frá sjávarútvegs- og landbúnaðarráðuneytinu

Vakin hefur verið athygli ráðuneytisins á að fréttatilkynningu þess frá því fyrr í dag mætti skilja sem svo að umboðsmaður Alþingis hafi úrskurðað í kærumáli Samtaka verslunar- og þjónustu þar sem tollaheimildir sjávarútvegs- og landbúnaðarráðherra voru véfengdar. VÞ en svo er ekki.

Hið rétta er að umboðsmaður tók ekki afstöðu til kæruefnisins en komst að þeirri niðurstöðu að sett lög samrýmdust ekki Stjórnarskrá.

Aftur á móti segir í áliti umboðsmanns Alþingis.

„Umboðsmaður rakti tiltekin ákvæði laga nr. 88/2005 og laga nr. 99/1993 og taldi að ekki yrði annað séð en að sjávarútvegs- og landbúnaðarráðherra hefði með framsali verið fengið vald til að ákvarða hvort sá afsláttur sem veittur væri frá greiðslu á fullum tolli samkvæmt tollalögum miðaðist við verð eða magn þeirrar vöru sem flutt væri til landsins í samræmi við tollkvóta samkvæmt viðaukum III A og B og IV A og B."

Beðist er velvirðingar á misskilningi sem framsetning ráðuneytisins kann að hafa valdið.