Fjöldi fólks minntist Eyþórs Darra

Pilturinn sem lést eftir bílslys á Geirsgötu á föstudagskvöld hét Eyþór Darri Róbertsson. Fjöldi fólks minntist hans á slysstaðnum í gærkvöld.

Vinir Eyþórs Darra skipulögðu minningarathöfnina sem fór fram á miðnætti í gærkvöld. Pilturinn lést af höfuðáverkum á gjörgæslu Landspítalans í gær, en hann slasaðist alvarlega þegar bílstjóri missti stjórn á bíl sem hann var farþegi í á gatnamótum Geirsgötu og Tryggvagötu síðastliðið föstudagskvöld, og hafnaði bifreiðin á húsvegg.

Fjöldi fólks kveikti á kertum eða skildi eftir blóm og kort við húsvegginn. Þá skildu einhverjir eftir afmæliskort og köku í minningu Eyþórs, en hann hefði orðið átján ára í dag.

Lögregla rannsakar nú tildrög slyssins, en meðal þess sem er til rannsóknar er hraði bifreiðarinnar, sem meðal annars verður reiknaður út frá grjóthnullungum sem færðust úr stað við áreksturinn.