Anna Garðars: Áttum helling í þessum leik

Anna Garðarsdóttir leikmaður Aftureldingar var svekkt með 1-0 tapið gegn Val í undanúrslitum Valitor-bikarsins. Anna er nýgengin í raðir Mosfellinga úr Val.

„Það er alltaf leiðinlegt að tapa. Mér fannst við eiga helling í þessum leik. Ég hefði kannski ekki verið ósátt fyrir leikinn með tap en ég er ósátt að hafa ekki fengið meira í dag," sagði Anna.

Valskonur voru sterkari aðilinn í fyrri hálfleik en Mosfellsstelpur komu mun ákveðnari til leiks í síðari hálfleik.

„Valur er með besta liðið. Það er engin spurning. Þær eru bæði sterkari og teknískari. En við börðumst vel, sérstaklega í seinni hálfleik."

Þetta var fyrsti leikur Önnu með Aftureldingu en hún kom til liðsins frá Val í félagaskiptaglugganum. Hún sér fram á bjarta tíma í Mosfellsbænum.

„Vonandi, mér sýnist það. Það eru komnir margir nýja leikmenn og við gerum okkar besta það sem eftir er af þessu. Þetta er bara spennnandi og gaman," sagði Anna.