Fangelsismálastjóri vaktaður í næsta mánuði

Fangelsismálastjóri gerir ráð fyrir að hægt sé að hefja notkun á rafrænni vöktun með föngum síðar á þessu ári. Hann ætlar sjálfur, ásamt öðrum starfsmanni Fangelsismálastofnunar, að ganga með slíkan búnað í viku til þess að prófa búnaðinn.

Fangelsismálastofnun kom að gerð frumvarpsins með embættismönnum úr innanríkisráðuneytinu. Páll Winkel fangelsismálastjóri segir að sér lítist mjög vel á þetta. „Þetta er eðlileg framþróun í fullnustukerfinu. Þetta er það sem löndin sem við berum okkur saman við hafa tekið upp fyrir allnokkru síðan," segir Páll í samtali við Vísi.

„Það þarf auðvitað að gæta fyllsta öryggis með því að velja vel hvaða hópur manna getur afplánað hluta refsingarinnar með rafrænu eftirliti. Þetta er hugsað þannig að þetta sé undir lok lengri afplánunar sem menn eigi kost á því að ljúka sinni afplánun undir rafrænu eftirliti," segir Páll í samtali við Vísi.

Páll segir að um verði að ræða tvennskonar eftirlit. „Annars vegar með GPS staðsetningartækni," segir Páll. Slík tæki séu ekki fullkomlega örugg því að hægt sé að klippa þau af. „Hið mannlega eftirlit skiptir ekki síður máli. Óreglulegar heimsóknir til heimila manna eða í vinnuna þeirra og jafnframt þá myndsímtöl," segir Páll. Hann segir að miklir hagsmunir séu í húfi fyrir hvern fanga vegna þess að ef hann svari ekki eða sé ekki til staðar á þeim tíma sem hann eig að vera þá fari hann beint aftur inn í lokað fangelsi. Páll segir að mikilvægt sé að slíkar reglur séu skýrar og farið sé eftir þeim. „Það hefur verið gert með samfélagsþjónustuna," segir Páll.

Páll segir að rafræna vöktunin verði vonandi tekin í gagnið á þessu ári. „Ef þetta fer í gegnum þingið - þá sé ég það gerast á þessu ári," segir Páll í samtali við Vísi. Páll segir þó að töluverð undirbúningsvinna þurfi að eiga sér stað. „Við erum meðal annars að skoða mismunandi tæknilegar útfærslur á þessu og munum meðal annars prófa, ég sjálfur og einn samstarfsfélagi, að láta fylgjast með okkur," segir Páll. Það muni vonandi gerast í sumar.

Páll segir að Fangelsismálastofnun hlakki til að fást við verkefnið. Hann leggur áherslu á að þetta kerfi ýti undir það að fangar vinni í sínum málum. „Þeir sem eru að gera eitthvað í sínum málum fá þá eitthvað fyrir það. Þannig að þeir sem fara fyrst í lokað fangelsi fara þaðan á betri deild - úr lokuðu fangelsi í opið fangelsi - úr opnu fangelsi á áfangaheimili og af áfangaheimili undir rafrænt heimili," segir Páll.