Þolendur og gerendur ná sáttum án tilkomu dómstóla

Hundrað mál sem koma til kasta lögreglunnar á ári hverju frá 2005 eru útkljáð með svokallaðri sáttamiðlun en í henni felst að þolendur og gerendur nái sáttum án tilkomu dómstóla. Í þessum málum gerast lögreglumenn sáttamiðlarar og mál hljóta oft farsælan endi.

Árið 2005 hófust lögregluyfirvöld handa við að innleiða svokallað sáttamiðlunarkerfi hér á landi vegna ESB tilskipunar. Hafsteinn Gunnar Hafsteinsson sáttamiðlari starfaði með lögreglunni að þessu fyrirkomulagi.

„Þar eru leiddir saman gerendur og þolendur til þess að leiða málin til lykta og finna viðeigandi lausn á vandanum,“ segir Hafsteinn Gunnar.

Þar geti gerendur beðist afsökunar og skýrt sína hegðun og þolendur komið á framfæri sínum skoðunum. Sáttasamningi er svo komið á og oft er samið um greiðslu miskabóta. Þetta úrræði hefur verið notað í minniháttar afbrotum og líkamsárásum, þjófnaði, skemmdarverkum og öðru.    

„Þetta er fyrir þolendur þannig að þeir fái lausn sinna mála og þeim sé bættur skaðinn. Síðan hefur þetta mikla kosti í kerfinu því málin leysast miklu fyrr, þetta sparar gríðarlegan pening og þetta er bara snilldar úrræði,“ segir Hafsteinn Gunnar.

Jón H.B. Snorrason, aðstoðarlögreglustjóri á höfuðborgarsvæðinu, segir að með þessu sé hægt að fá ásættanlega málsmeðferð fyrir þessa einstaklinga með minni fyrirhöfn og tilkostnaði fyrir lögreglu og réttarkefið í heild sinni. „Þannig að af þessu verður mikill ávinningur.“

En nágrannaþjóðir okkar eru komnar lengra og nota sáttamiðlun í alvarlegri málum eins og heimilisofbeldi, kynferðisbrotum og morðmálum. „Við erum bara orðin mjög miklir eftirbátar annarra þjóða og það er mjög alvarlegt mál,“ segir Hafsteinn Gunnar.

Hafsteinn Gunnar segir góðan árangur af þessari aðferð auk þess sem bæði þolendum og gerendum líði betur.