Telja lögreglu brjóta gegn ákvæðum stjórnarskrár

Málsmetandi lögmenn telja að lögreglan hafi brotið gegn ákvæðum stjórnarskrár um friðhelgi heimilisins, þegar hún tók myndatökumann Morgunblaðsins með í húsleit á dögunum

Maður sem lögregla gerði húsleit hjá í fylgd myndatökumanns fréttavefs Morgunblaðsins fyrir nokkrum mánuðum er afar óhress með þá framgöngu lögreglunnar. Í DV í dag segir maðurinn nóg komið af ógæfu í hans lífi. Lagt var hald á nokkuð magn fíkniefna í húsleitinni og segir maðurinn að rangt hafi verið farið með það magn sem fannst í innslagi sem birt var á fréttavef Morgunblaðsins. Fullyrt er að 50 grömm af maríúana hafi verið gerð upptækt , lítið magn af amfetamíni og töluvert magn af íblöndunarefnum til að drýgja amfetamín.

Húsráðandi segir hins vegar í DV að í ákæru komi fram að rúm 18 grömm af maríúana hafi fundist ásamt 0,22 grömmum af amfetamíni en ekki er minnst á íblöndunarefnin. Þá er maðurinn ákærður fyrir vopnalagabrot en samuræjasverð fannst í húsinu.

Húsleitin var gerð 16. desember. Í innslaginu sést vel hvernig húsráðandi býr en andlit hans og annarra sem í húsinu voru eru hulin.

Lögreglustjóri segir þetta ekkert athugavert

Stefán Eiríksson lögreglustjóri í Reykjavík sagði í samtali við fréttastofu að hann sæi ekkert athugavert við að lögregla tæki fréttamenn með sér inn á heimili fólks þar sem gerð væri húsleit. Tilgangur þess væri að gefa innsýn í störf lögreglunnar. Ekki hafi verið óskað eftir heimild dómara fyrir því að hafa fjölmiðil með í för enda þurfi lögreglan þess ekki.

Geta aukið á niðurlægingu meints brotamanns

Málsmetandi lögmenn sem fréttastofan ræddi við eru algerlega ósammála lögreglustjóranum og segja að um brot á ákvæði stjórnarskrár um friðhelgi heimilisins sé að ræða. Heimild sem dómari gefi lögreglu til að rjúfa friðhelgi heimilisins vegna rökstudds gruns um lögbrot, geti ekki náð til fjölmiðla, enda geti aðkoma þeirra að húsleit aukið á niðurlægingu meints brotamanns og jafnvel virkað honum til sakbendingar áður en rannsókn máls sé lokið.

Einn lögmanna sagði að saksóknaraembættið hlyti að skoða þennan þátt málsins.