Reykjadalur í Mosfellsdal hlaut samfélagsverðlaun Fréttablaðsins

Samfélagsverðlaun Fréttablaðsins voru afhent við hátíðlega athöfn í Þjóðmenningarhúsinu síðdegis í dag. Forseti Íslands, Ólafur Ragnar Grímsson, afhenti verðlaunin. Þetta er í sjötta sinn sem Fréttablaðið veitir Samfélagsverðlaunin en þau eru veitt í fjórum flokkum auk heiðursverðlauna.

Samfélagsverðlaunin

Að þessu sinni hlýtur Reykjadalur í Mosfellsdal Samfélagsverðlaun Fréttablaðsins.

Í Reykjadal hafa verið reknar sumarbúðir í nærri hálfa öld.Þær eru reknar af Styrktarfélagi lamaðra og fatlaðra. Í Reykjadal dveljast árlega milli tvö og þrjú hundruð fötluð börn af öllu landinu. Á sumrin býðst sumardvöl, í eina eða tvær vikur í senn, en yfir vetrarmánuðina er þar boðin helgardvöl. Útivera skipar veigamikinn sess í starfinu í Reykjadal, meðal annars í sundi og heitum potti sem þar er. Í Reykjadal starfar drífandi hópur ungs metnaðarfulls fólks. Það kom sér vel þegar útlit var fyrir að leggja þyrfti vetrardvöl barna í Reykjadal niður vegna fjárskorts. Þá efndi starfsfólkið til áheitagöngu og tókst að safna fé til að halda starfseminni gangandi í vetur.

Forseti Íslands, Ólafur Ragnar Grímsson, afhenti fulltrúum Reykjadals verðlaunin. Ari Edwald, forstjóri 365, afhenti þeim síðan verðlaunafé að upphæð ein milljón króna.

Aðrir sem voru útnefndir til Samfélagsverðlaunanna:

Samtök kvenna af erlendum uppruna

Góði hirðirinn

Hvunndagshetja

Hvunndagshetja ársins 2010 er Ásmundur Þór Kristmundsson. Ásmundur Þór er björgunarsveitarmaður en var í skemmtiferð í Þórsmörk þegar hann vann þar björgunarafrek í ágúst 2010.

Aðrir sem voru tilnefndir í þessum flokki:

Júlíana Signý Gunnarsdóttir

Stefán Helgi Stefánsson

Frá kynslóð til kynslóðar

Verðlaun í þessum flokki fær Jón Stefánsson, en tónlistaruppeldi Jóns í Langholtskirkju hefur opnað heim tónlistar fyrir fjöldamörgum börnum og unglingum og skilað hæfu tónlistarfólki.

Aðrir tilnefndir í þessum flokki:

Möguleikhúsið

Skólahreysti

Til atlögu gegn fordómum

Listasmiðjan Litróf hlýtur verðlaunin í þessum flokki fyrir fyrir að vinna að vináttu milli barna af erlendum uppruna og íslenskra barna með því að stefna þeim saman í leik og listum.

Aðrir tilnefndir í þessum flokki:

Íþróttafélagið Styrmir

Pollapönk

Heiðursverðlaun

Heiðursverðlaun Samfélagsverðlauna Fréttablaðsins hlýtur Jenna Jensdóttir fyrir farsælan kennsluferil og afkastamikil barnabókaskrif í áratugi. Þeim sem nutu kennslu Jennu er hún afar minnisstæður kennari. Barnabækur Jennu eru á þriðja tug en flestar skrifaði hún í félagi við mann sinn Hreiðar heitinn Stefánsson.

Um verðlaunin

Vel á fjórða hundrað tilnefninga til Samfélagsverðlaunanna bárust frá lesendum Fréttablaðsins að þessu sinni. Markmið með Samfélagsverðlaununum er að beina sjónum að þeim góðu verkum sem unnin eru í samfélaginu. Þetta er í sjötta sinn sem Fréttablaðið veitir Samfélagsverðlaunin.

Samfélagsverðlaun Fréttablaðsins eru sem fyrr segir ein milljón króna, aðrir verðlaunahafar fengu Nokia C5-03 farsíma frá Hátæknií verðlaun auk verðlaunagripa sem eru hannaðir og smíðaðir af Ásgarði, Mosfellsbæ.