Úthlutun aflaheimilda breytt í nýtingarheimildir

Ríkisstjórnin mun leggja fram frumvarp um breytingar á lögum um stjórn fiskveiða fljótlega í næsta mánuði. Frumvarpið felur í sér að úthlutun á aflaheimildum verði breytt í nýtingarheimildir samkvæmt samningum til afmarkaðs tíma. Samtök atvinnulífsins harma að ríkisstjórnin skuli ekki hafa nýtt það sem samtökin kalla einstakt tækifæri til að ná nauðsynlegri sátt um málefni sjávarútvegsins. Samtök atvinnulífsins hafa lagt fram tillögur um breytingar á fiskveiðistjórnunarkerfinu sem fela í sér útfærslu á samningaleið í sjávarútvegi, að því er fram kemur á vef samtakanna.

Þar er einnig að finna tillögu ríkisstjórnarinnar. Megintillögur frumvarpsins fela sem fyrr segir í sér að úhlutun á aflaheimildum verði breytt í nýtingarheimildir samkvæmt samningum til afmarkaðs tíma. „Hluti þeirra renni í áföngum til byggða- og leigupotta; þjóðin njóti arðs af auðlindinni með gjaldtöku. Varanlegt framsal verði takmarkað. Nú er unnið að hagfræðilegri úttekt á tillögunum. Tekur hún til efnahagslegra áhrifa og rekstrarskilyrða í sjávarútvegi."

Samtök atvinnulífsins hafa sent ríkisstjórninni tillögur að sátt í sjávarútvegi og hafa óskað eftir frekari viðræðum um tiltekin efnisatriði og útfærslu þeirra, s.s. lengd afnotatíma, magn aflahlutdeilda sem verði ráðstafað af ríkinu , framsal aflaheimilda og upphæð veiðigjalds auk fleiri þátta.

Kjaraviðræðum mun að öllum líkindum ljúka í kvöld. Samningurinn sem nú er rætt um í Karphúsinu mun gilda í tvo mánuði fyrst um sinn með möguleika á framlenginu. Vilhjálmur Egilsson, framkvæmdastjóri SA, sagði í fréttum Stöðvar 2 að sjávarútvegsmálin hafi einna helst komið í veg fyrir að samið yrði til þriggja ára.