Lögreglumenn með undir 200 þúsund í laun eftir skatta

Heildarlaun lögreglumanns sem hefur verið næstum fimm ár í starfi og getur ekki, vegna fjölskylduaðstæðna, unnið næturvinnu voru í síðasta mánuði rúmar tvöhundruð sjötíu og fimm þúsund krónur.

Í fyrra voru heildarlaun lögreglumanna að meðaltali fimmhundruð og tólf þúsund sjö hundruð áttatíu og átta krónur samkvæmt heimasíðu fjármálaráðuneytisins. Fréttastofa hefur undir höndum launaseðla fimm lögreglumanna fyrir ágústmánuð og einungis einn þeirra nær þessum heildarlaunum sem koma fram á heimasíðu ráðuneytisins.

Lægstu heildarlaunin á seðlunum eru tvöhundruð sjötíu og fimmþúsund fjögur hundruð og sex krónur og eru það laun lögreglumanns sem hefur verið næstum fimm ár í starfi, en vegna fjölskylduaðstæðna hefur viðkomandi dregið sig úr næturvinnu.

Grunnlaun lögreglumannsins eru tvöhundruð og ellefu þúsund áttahundruð og tvær krónur, en á bakvið þá upphæð eru rúmar hundrað sjötíu og þrjár klukkustundir í vinnu. Yfirvinna lögreglumannsins í mánuðinum er engin, en vegna vinnu á kvöldin eru greiddar rúmar ellefu þúsund krónur og fyrir þá vaktavinnu sem lögreglumaðurinn vann um helgar fær hann greiddar rúmar tuttugu og eitt þúsund krónur í vaktaálag.

Lögreglumenn í vaktavinnu hafa ekki sérstaka matar- og kaffi tíma en er þó heimilt að neyta næringar við vinnu sína á vaktinni ef því verður við komið starfsins vegna. Vegna þessa fær lögreglumaðurinn greiddar 9238 krónur fyrir mánuðinn. Fleiri upphæðir týnast til og má þar nefna orlof á yfirvinnu, sérstaka álagsgreiðslu og fastan símakostnað.

Samtals gera þetta laun upp á tvöhundruð sjötíu og fimmþúsund fjögur hundruð og sex krónur og eftir að skatturinn er búinn að komast í launin fær lögreglumaðurinn í vasann hundrað áttatíu og tvöþúsund níu hundruð og fjörutíu krónur.