Prófdómari víki af lögmannanámskeiði

Þórður S. Gunnarsson, forseti lagadeildar Háskólans í Reykjavík, gagnrýnir harðlega tilhögun námskeiða og prófa sem lögfræðingar taka til að fá réttindi sem héraðsdómslögmenn.

„Forseta lagadeildar Háskóla Íslands er það skiljanlega mikið kappsmál að nemendum deildarinnar gangi vel á hdl.-prófinu svokallaða. Það er því með öllu óásættanlegt og brýtur í bága við vandaða stjórnsýsluhætti og hæfisreglur að eiginmaður deildarforsetans, Markús Sigurbjörnsson hæstaréttardómari, með fullri virðingu fyrir honum, skuli vera prófdómari á hdl. námskeiðinu," segir Þórður.

Þá segir Þórður að hafa verði í huga í þessu sambandi að prófraunin sem Markús sé prófdómari í sé munnleg. „Það er reyndar sjálfsögð og eðileg krafa að öll prófin á námskeiðinu verði eftirleiðis skrifleg og tekin á prófnúmerum en ekki undir nafni," segir hann.

Að sögn Þórðar hefur verið staðfest að einn af kennurunum á námskeiðinu, sem jafnframt sé kennari við lagadeild HÍ, hafi á undanförnum árum haft fyrir reglu að leggja fyrir nemendur á hdl. námskeiðinu að stórum hluta sömu prófspurningar og hann hefur áður lagt fyrir nemendur í prófum við lagadeild HÍ.

„Af þessum sökum hafa nemendur lagadeildar HÍ haft mun meiri tíma og tækifæri til undirbúnings en nemendur frá öðrum lagadeildum, sem aðeins fá tvo daga til undirbúnings. Þetta er óásættanleg mismunun og reyndar sérstakt athugunarefni hvers vegna þessi framkvæmd hefur verið látin viðgangast," segir Þórður.

Eins og fram kom í Fréttablaðinu á mánudaginn var, virðast tölur frá prófnefnd Lögmannafélags Íslands sýna að lögfræðingar úr Háskóla Íslands standi sig betur á áðurnefndu námskeiði en lögfræðingar úr öðrum háskólum hérlendis. Þórður segir þessar tölur vera mjög villandi og að þeim beri að taka með miklum fyrirvara. Hann bendir á að af 45 lögfræðingum útskrifuðum frá Háskólanum í Reykjavík, sem skráðu sig í hdl. prófið á árunum 2007 til 2009, hafi 38 staðist prófið eða 84,4 prósent.

Þórður segist ekki vera að varpa rýrð á hdl.-námskeiðið í heild. „Ég hygg hins vegar að ég mæli fyrir munn margra þegar ég segi að löngu sé tímabært að endurskoða inntak námskeiðsins og framkvæmd með hliðsjón af því hvaða tilgangi það eigi að þjóna."

gar@frettabladid.is