Foreldrar hafa hagsmuni barna í forgangi í kreppunni

„Upplýsingar sem lágu fyrir hjá okkur fram að áramótum eru þær, að börnunum líður almennt vel nú á krepputímum. Foreldrar virðast setja þau í félagslegan og fjárhagslegan forgang.“

Þetta segir Ragnar Þorsteinsson, fræðslustjóri Reykjavíkur og stjórnandi Menntasviðs Reykjavíkurborgar, sem fer fyrir teyminu „Börnin í borginni“.

Teymið hefur starfað frá því í október 2008, eða frá bankahruni. Hópurinn samanstendur af starfsmönnum Reykjavíkurborgar sem vinna með börnum í leikskólum, grunnskólum, frístundaheimilum og félagsmiðstöðvum. Í teyminu eru einnig fulltrúar frá menningar- og ferðamálasviði Reykjavíkur, Mannréttindaskrifstofu og Samfok.

Teymið hittist reglulega og fer yfir stöðu mála. Leitað er upplýsinga hjá skólastjórum og þannig reynt að fá sem heildstæðasta mynd af líðan barna í borginni.

„Upplýsingar um vanskil á greiðslum vegna skólamáltíða barna segja okkur að vanskilin eru minni, ef eitthvað er, en þau voru á árinu 2007, sem dæmi. Þá kaupa nú fleiri nemendur mat en áður,“ segir Ragnar. „Sama máli gildir um leikskólann og frístundaheimilin.“

Menningar- og ferðamálasvið Reykjavíkur rekur meðal annars söfnin í borginni. „Það er mjög gleðilegt að segja frá því að allar uppákomur á söfnunum virðast falla vel í kramið hjá foreldrum og börnum, því þau eru mjög vel sótt af fjölskyldufólki. Ályktunin er þessi að fólk virðist forgangsraða sínum tíma í þágu barnanna okkar og standa vörð um velferð þeirra.“

Ragnar segir vissulega alltaf einhverja einstaklinga sem falli ekki inn í meðaltalið. Unnið sé með þá á einstaklingsgrundvelli í samvinnu við velferðarþjónustuna.

„En heildarniðurstaðan er sú að börnunum í borginni líður vel. Þau sækja skólann vel og stunda námið vel. Foreldrar eru duglegir við að koma til aðstoðar inn í það starf hjá skólanum sem þeir eru kallaðir til. Þetta er hin almenna staða byggð á upplýsingum frá skólastjórum í borginni.“

Spurður hvort niðurstaðan sé í raun sú að kreppan hafi þjappað fjölskyldunni saman í starfi og leik, segir Ragnar að svo virðist sem gildismat og gildi séu að breytast í þá veru að foreldrar forgangsraði tíma sínum og fjármunum í þágu barnanna.

jss@frettabladid.is