Robben ferðast með Bayern-liðinu til Manchester

Hollendingurinn Arjen Robben fer með Bayern Munchen til Manchester þar sem liðið mætir Manchester United á miðvikudaginn í seinni leik liðanna í átta liða úrslitum Meistaradeildarinnar.

Arjen Robben var ekki með í fyrri leiknum sem Bayern vann 2-1 en hann hefur skorað mörg af mikilvægustu mörkum liðsins á tímabilinu. Robben hefur alls skorað 14 mörk í 26 leikjum í öllum keppnum á tímabilinu.

„Ég vona að hann geti spilað með okkur en við verðum samt að bíða og sjá til með það," sagði Louis van Gaal, þjálfari Bayern, í viðtali á heimasíðu félagsins.

Varnarmaðurinn Daniel van Buyten verður líka með Bayern á miðvikudaginn en hann fór meiddur af velli í sigrinum á Schalke 04 á laugardaginn. Bastian Schweinsteiger mun líka snúa aftur í Bayern-liðið eftir að hafa tekið út leikbann í fyrri leiknum.