Í farbann fyrir að hrista barn

Móðir ungabarns og sambýlismaður hennar hafa verið úrskurðuð í farbann og staðfesti Hæstiréttur Íslands úrskurð Héraðsdóms Reykjaness þess eðlis í dag.

Sambýlismaður konunnar er grunaður um að hafa veitt barninu áverka með því að hrista það harkalega. Parið, sem eru af pólskum uppruna, þykja líkleg til þess að flýja af landi brott samkvæmt dómsorði.

Málið komst upp síðasta sumar en þá rannsakaði læknir barnið. Hann tilkynnti málið svo til lögreglu þar sem sterkar vísbendingar væru um að einhver hefði hrist barnið harkalega með þeim afleiðingum að það muni hugsanlega ekki bíða þess bætur.

Þá segir í dómi að konan hafi fengið barnið aftur í sínar hendur á meðan rannsókn málsins fer fram. Farbannið rennur út 6. apríl.