Öll umferð að gosinu bönnuð

Lögreglan á Hvolsvelli hefur lokað fyrir alla umferð að gosstöðvunum á Eyjafjallajökli vegna nýrrar sprungu sem myndaðist þar í gærkvöldi. Engin umferð verður leyfð upp á svæðið en almannavarnanefnd fundar klukkan ellefu og tekur ákvörðun um framhaldið.

Að sögn varðstjóra á Hvolsvelli er beðið eftir niðurstöðum frá þeim fundi. Þangað til verður lokað upp á jöklana, Fimmvörðuháls og Þórsmörk.

Lögreglan vill koma því áleiðis að það verður ekki hægt að fara nálægt gosinu í dag fyrr en almannavarnanefnd hefur tekið ákvörðun um að slíkt sé óhætt. Ákvörðun almannavarnanefndarinnar ætti að liggja fyrir í hádeginu.