Capello hættir eftir EM 2012

Fabio Capello hefur staðfest að hann muni láta af þjálfun enska landsliðsins eftir EM árið 2012.

Capello hefur verið við stjórnvölinn síðan í janúar árið 2008. Undir hans stjórn lék enska landsliðið vel í undankeppni HM en brást svo illilega í sjálfri lokakeppninni.

Hann hefur þurft að þola mikla gagnrýni eftir HM og suma afar persónulega. Það hefur honum líkað illa.

Áreitið í vinnunni er þess utan mikið þar sem helstu stjörnurnar hans hafa verið gripnar með allt á hælunum síðustu mánuði.